विषालु वामपन्थ [Bishalu Bampanth]

यो पुस्तक विद्वत्ताको भ्रम पालेर लेखिएको होइन । ऐतिहासिक घटनाक्रम लगायत समयको पहिचान गर्नका लागि पनि सिफारिसयोग्य होस् भन्ने चाहना होइन । यस पुस्तकको स्तर चियापसल तथा चोक र चौबाटोमा हुने चर्चा भन्दा माथिको नहोला ! त्यतिमाथिको बनाउने प्रयास पनि गरिएन । न त्यसो गर्ने मनसाय नै थियो । यो पुस्तक पढ्नका लागि लेखिएको हो, कोठामा सजाउनका लागि होइन । बस वा रेल स्टेशनमा किनेर यात्रा अवधिभरि पढेर पाठकहरूले त्यहीँ छोडेर जाऊन्, आफैंसँग लिएर जाने कष्ट नगरून् । सस्ता पुस्तकको पंक्तिमा यसलाई राखियोस् । यस पुस्तकलाई तपाईं यात्राका क्रममा बसेको सिटमै छोडेर जानुहोला । अर्को यात्रीले त्यसलाई पढ्न पाओस् । जोकोहीले पनि पढ्न सकून् - बस स्टेशनका ड्राइभर, खलासी, ठेलागाडामा पसल चलाउने व्यक्ति, भरिया, कपडा सिलाउने लगायत तमाम सामान्य मानिस । उनीहरूले पढून् र सोचून् । यो पुस्तक त्यस्तो पुस्तकको लिस्टमा नपरोस् जुन १० लाख प्रति बिकेर पनि दश हजार जनाले सबै पृष्ठ छिचोल्न नसकोस् । बरू यसको ५ हजार प्रति मात्र बिकोस् तर एक लाख मानिसले पढून् । पढ्नुहोस्, तर यसलाई सजाउने लायकको किताब नसम्झनुहोस् । बरु अर्को व्यक्तिको हातमा थमाइदिनुहोला । वैचारिक प्रामाणिकताका लागि यस पुस्तकको दार्शनिक विद्वत्ता, ऐतिहासिक स्पष्टता, साहित्यिक सौन्दर्यविहीनताको दाबी पुनः एकपटक गर्न चाहें । यो पुस्तक मैले आफ्नो दृष्टिकोणका आधारमा लेखेको हुँ । संसार जसरी देखें, जसरी बुझें त्यसरी नै लेखें । यसमा गहिरो ज्ञान र राजनीतिक प्रतिबद्धताको मसला मिसाएको छैन । यो पुस्तक विश्वविद्यालयमा शोध गरिरहेका प्राज्ञिक र मिडियामा ज्ञान बाँड्ने बुद्धिजीवीहरूका लागि उपयुक्त नहोला ! यो तपाईं हाम्रा लागि हो । यसमा भावी पुस्ताको भविष्यको चिन्ता छ । देश र समाजको भविष्यको चिन्तन छ । जे छ, सत्यनिष्ठा र सरल बुद्धिबाट सोचेर लेखिएको यो पुस्तक तपाईंसामु छ…..