राणाकालीन प्रमुख ऐतिहासिक दरबारहरू [Ranakalin Pramukha Aitihasik Durbarharu]

इहितासकार श्री पुरुषोत्तमशमशेर जबराको जन्म वि.सं. १९८२ चैत्र महिनामा भएको हो। उहाँ नेपालका प्रथम फिल्ड मार्सल रुद्रशमशेरका नाति र कर्णेल ईश्वरशमशेरका छोरा हुनुहुन्छ । उहाँले भारतको जयनारायण कलेज वाराणसीबाट उच्च शिक्षा हासिल गर्नुभएको हो । उहाँ युवावस्था अर्थात् वि.सं. १९९७ सालदेखि नै प्रजातान्त्रिक भावनाबाट प्रेरित हुनुहुन्थ्यो भने वि.सं. २००७ सालको आन्दोलनमा महत्वपूर्ण भूमिका खेल्नु भएको थियो । त्यसबेला उहाँले मुक्तिसेनाका लागि भारतको बङ्गाल, उत्तर प्रदेश, बिहार प्रान्तहरुबाट हातहतियार, खरखजाना र खाकी पोशाक आदि सरसामानहरु तथा नेपालका तराईतर्फका जमिन्दारहरुबाट रसद इत्यादिसमेत पश्चिम क्षेत्र कृष्णनगर र बहादुरगञ्जका मोर्चासम्म पुऱ्याउने कार्य गर्नुहुन्थ्यो । स्वर्गीय श्री ५ त्रिभुवन नयाँ दिल्लीको हैदराबाद हाउसमा भारत सरकारको पाहुनाको रुपमा राज होइबक्सेको बखत उहाँ बराबर त्यहाँ गएर विभिन्न क्षेत्रका सन्देशहरु श्री ५ त्रिभुवनमा जाहेर गर्नुहुन्थ्यो । विद्वान इतिहासकारका रुपमा प्रसिद्धि पाउनुभएका पुरुषोत्तमशमशेरका श्री ३ हरूको तथ्य वृत्तान्त पुस्तक दुई भागमा (प्रथम संस्करण वि.सं. २०४७, दोस्रो संस्करण २०५९ र तेस्रो संस्करण २०६२) अंग्रेजी भाषामा जङ्गबहाजुर राणा : द स्टोरी अफ हिज राइज एण्ड ग्लोरी (२०५५), सम्झेरका र सुनेका कुराहरू (२०६०) र भएका र गुज्रेका घटनाहरू (२०६३) पुस्तकहरू प्रकाशित भएका छन् । नेपाली र अंग्रेजी दुबै भाषामा लेखिएका नेपालका ऐतिहासिक व्यक्तित्वहरुसम्बन्धी उहाँका अनकौं लेखहरु विभिन्न अन्तर्राष्ट्रिय, राष्ट्रिय, दैनिक तथा साप्ताहिक पत्रिकाहरुमा प्रकाशित भएका छन् । नेपाली इतिहास तथा दुर्लभ चित्रहरुका सम्बन्धमा रेडियो तथा नेपाल टेलिभिजनमा उहाँका अन्तर्वार्ताहरु पनि प्रसारण भएका छन् । विभिन्न अवसरहरुमा उहाँले भारत, पाकिस्तान, बङ्लादेश, तिब्बत, थाइल्याण्ड, हङकङ, सिङ्गापुर, जर्मनी, हल्याण्ड, अमेरिका, क्यानडा आदि मुलुकहरुको भ्रमण गर्नुभएको छ ।